Go not gently into the night, rage against the dying of the light!

Friday, October 9, 2015

PADAYAG PARA SA ADLAW PAGHINUMDUM SA KAMATAYON NI JENNIFER LAUDE, SA KAMATAYON SA SOBERENYA SA PILIPINAS

Tel. No.: (032) 253-9682/ Blogsite: http://kpd-cebu.blogspot.com/
FB Acct.: KILUSAN CEBU/ Email Add.: kpd_n_cebu@yahoo.com

October 11, 2015


Usa ka tuig na ang nilabay gikan sa makalilisang nga pagpatay ni Jennifer Laude, ang transgender woman nga nahipalgang patay sa usa ka motel human nga gi-arm lock ug gilumsan ni Lance Cpl. Scott Pemberton.  Usa ka kagabhiun nga wala damha sa pamilyang Laude nga katapusan na nilang makitang buhi si Jennifer.  Usa ka panghitabo nga masulub-on dili lamang para sa pamilya ni Jennifer, apan masulub-on usab para sa tanang mga LGBT ug sa katawhang Pilipino sa kinatibuk-an.

Walay katarungan ang posibleng makabarug aron maingon nga insakto lang ang pagpatay ni Jennifer, siya nga walay ikasarang nga mudepensa sa kaugalingon, si Jennifer nga napahiubos sa kusog ug kapungot ni Pemberton tungod ug gumikan sa pagkapakyas ni Pemberton sa iyang tumong nga matagbaw sa iyang lawasnong panginahanglan!  Susama sa uban pang LGBT, naalaot si Jennifer sa usa ka tipo ug mabangis nga diskriminasyon.  Susama sa kabag-ang kababayen-an nga naalaot kung dili man napanamastamasan ug nadaug-daog ubos sa kabangis sa sistemang patriyarkal ug pagtratar nga butang kapahimuslan (object of desire) ang babaye sa katilingban.

Apan ang pagkamatay ni Jennifer di lamang usa ka simple og ordinaryong krimen nga angay natong kapungtan ug pagkakondenahon, ang iyang pagkamatay timaan sa pagkalubog o pagyatak sa tibuok natong katungod sa atong nasud ilabi na sa atong katungod sa kaugalingnan o soberenya!  Ang mga basehan mao ang mga musunod:

  1.         Ang nakapatay ni Jennifer Laude nga si Lance Cpl. Scott Pemberton, usa ka sundalong Amerikano nga nidapit sa atong nasud para sa usa lamang ka military exercise o pagbansay-militar.  Usa ka langyaw!
  2.      Ang nagtugot sa pareho ni Pemberton nga makalaroy-laroy  sa atong nasud nga libre sa mga panubagon sa unsa mang mga kalapasan sulod sa atong nasud mao ang kasabutan nga VFA ug gipatuman sa EDCA kun Enhanced Defense Cooperation Agreement hain nagtugot pag-usab sa presensya sa mga dinaghan nga mga sundalong mga Amerikano ug pagdala sa ilang mga armas ug mga pasilidad de militar sulod sa atong nasud ug sa pagtinuod, magbase na usab dinhi sila!
  3.     Kasamatangang giatubang ni Pemberton ang kasong Murder ug gipaabut na ang desisyon sa Korte sa dili pa o sa mismong adlaw sa Disyembre 14 ning maong tuiga.  Apan adunay huhungihong nga kini mapaubos sa kasong Homicide—usa ka krimen nga sa simpleng pag-isplikar, wala matuyo o walay intensyong mupatay.  Dako ang mamahimong epekto niini kung sa hisgutanan sa silot nga mapahamtang sa kang Pemberton.  Labing kapait pa, posibleng aregluhon lamang sa atong Gubyerno o sa gubyerno sa US ang maong kaso ingon dili hingpit nga mapatuman ang hustisya sa pagkamatay ni Jennifer


Ang tanan nga gisaysay nga mga basehan, mga punto nga gikinahanglan ang atong pakabana ug paglimbasug! 

Kung dili mapatuman ang balaod ug ang silot sa mga kalapasan sa atong mga balaud ngadto sa mga abusadong mga langyaw, mudaghan pa ang mga pagpangabuso sa mga langyaw natong mga Pilipino, ug kini anaa pa sa atong kaugalingon yutang natawhan!

Kung dili mababagan ang EDCA ug mapabasura ang VFA, mas mudaghan pa ang susamang mga krimen nga mahitabo tungod mas daghan pang mga sundalong Amerikano ang mudapit sa atong nasud sa umaabot nga mga buwan kung kini maaprubahan sa Korte Suprema ang constitutionality niini!  Karong Disyembre 15 usab ang desisyon kabahin ani!  Sa kasayuran sa tanan, ang EDCA, wala magahatag ug gahum sa atong Gubyerno aron madumalaan o maipatuman ang atong mga balaod tungod sulod sa maong kasabutan gyud mismo ang pagkalas sa gahum sa Gubyerno sa Pilipinas sa mga sundalong Amerkano ug sa ilang mga kagamitang-militar!

Kung dili maipatuman ang pagkabalhug ni Pemberton sa atong prisohan, samot kung mapaubos ang krimen ug silot niini, walay integridad ug walay kabililhun na ang atong soberenya sa nasud, ang atong sistema sa hustisya!  Usa kini ka pag-biay-biay sa atong demokrasya! Sa atong katungod isip gawasnun ug may soberenya nga nasud!

GIAWHAG NAMO ANG PUBLIKO NGA MULANTAW SA ATONG KAHIMTANG SA NASUD UBOS SA MAO GIHAPONG PAGPANGULIPON SA U.S. nga nagpakita sa pagkamatay ni Jennifer.  Dili pa maundang ang susamang mga krimen parehas sa pagkapatay sa SAF 44 hain aduna usab nga kalambigitan sa maong opersayon ang US military kung dili nato pugngan ang pagpapasar sa EDCA ug kung dili nato mapabasura ang VFA.

Pakigbisugan nato ang atong katungod sa soberenya pinaagi sa pagpadangat sa atong tingog ngadto sa kagamahanan nga ipahamtang ang hustisya para sa pamilyang Laude ug para sa tibuok katawhang Pilipino pinaagi sa pagpapabalhug ug pagsilot ni Pemberton ubos sa balaod sa Pilipinas!

Lig-on nga panalipdan ang atong integridad ug dignidad isip PILIPINO

Ipaduso ang tiunay nga Hustisya ug Demokrasya!

No comments: