Ano ang itinutulak na “rebolusyonaryong gubyerno” ni Duterte?

Ang deklarasyon ng rebolusyonaryong gubyerno ng nakaupong presidente ay isang extra-constitutional na hakbang. Lampas at tuwirang labag ito sa itinatadhana ng Konstitusyon at sa gayun ay nagpapawalang- bisa o nagbabasura ng Konstitusyong1987.

Ang Konstitusyon ay pinagtibay ng mga mamamayan sa reperendum-plebesito noong 1987. Sa gayon, ang Konstitusyong 1987 ay kumakatawan at ekspresyon ng soberanong kapasyahan at kapangyarihan ng sambayanang Pilipino. Sa ilalim ng Konstitusyong 1987 nahalal at binigyan ng mandato si Duterte para gampanan ang mga tungkulin ng pangungulo sa estado at gubyerno alinsunod sa mga kapangyarihang iginagawad  sa kanya ng Konstitusyong 1987.

Ang pagdedeklara ng rebolusyonaryong gubyerno  ni Duterte ay tuwirang salungat sa  Konstitusyon at sa gayun, ay malinaw na pang-agaw at pagmonopolyo ng kapangyarihan upang solong maghari. Lampas-lampas ito sa ipinagkaloob ng mamamayan na mandato.  Ito’y kudeta mula sa Malacanang o kudeta mula se sentro.

Pagbasura ito ng Konstitusyon at lahat ng garantiya – ekonomiko, pulitikal at kultural na karapatan – na ipinagkakaloob nito sa mga mamamayan. Kung mangyayari,wala nang mapag-uusapang konstitusyunal na mga karapatan at kalayaang sibil na maigigiit ng mamamayan.

Ito’y paghaharing di hinahangganan ng batas – isang absoluto, diktaduryal na paghahari na walang pinananagutan kundi ang sarili. Isasara ang Konggreso at Korte Suprema at si Duterte ang batas – siya ang gagawa at magpapatupad ng batas. Kung mangyayari, maaari pang gawin ni Duterte ang sumusunod:

•     Ideklarang bakante ang lahat ng pusisyon sa gubyerno – inihalal man o hinirang nang may proteksyon  mga batas sa serbisyong sibil – at tanggalin ang mga di niya gusto upang palitan ng mga nagpapakayupapa sa kanya;

·         Ipaaresto at ipakulong nang walang taning ang sinumang kalaban niya o sinumang layon niyang supilin (ginawa ito ni Marcos sa pamamagitan ng Preventive Detention Act at Presidential Commitment Order);

·         Maaaring kumpiskahin niya ang pribadong ari-arian ng mga katunggali (ginawa ni Marcos laban mga Lopez, Rufino at Jacinto) upang magkamal ng higit na yaman;

·         Maaring magpataw siya ng parusang kamatayan (ginawa rin ito ni Marcos);

·         Pasaklawin pa ang kasalukuyang walang -pakundangang pamamaslang sa mga suspek na drug user, pusher at criminal;

·         Ipakandado ang lahat ng imprenta, at lahat ng istasyon ng TV at radio, pahayagan o diaryo, at pahintulutan lang ang magbabandila ng mga gusto niyang makaabot sa publiko;

·         Bigyan ng ganap na akses ang mga dayuhan sa mga likas na yaman ng bansa at supilin ang anumang pagtutol ng mga komunidad ng mamamayan na naggigiit ng karapatan dito;

·         Buksan sa mga dayuhang kapitalista ang mga pampublikong serbisyo (edukasyon, pangkalusugan, pang-isports), gayundin ang mga pampublikong utilidad (tubig at patubig, transportasyon at kaakibat nitong pier, airport, haywey, komunikasyon, media) sa dayuhang control, at ipailalam ang mamamyang Pilipino sa walang-pakundangang pagkakamal nila ng tubo;

·         Pahintulutan ang pagbabase at operasyon ng mga dayuhang tropa sa bansa, at kaladkarin ang bayan sa tunggalian ng mga higanteng pandaigdigang kapangyarihan;

·         Hati-hatiin ang bayan sa mga teritoryong paghaharian ng kanyang mga kakutsabang pampulitikang panginoon, tulad ng nais nilang mangyayari sa panukalang pederalismo; at

·         Iba pang mga hakbang na susupil sa mga demokratiko at soberanong karapatan ng mamamayan.

Sa ilaalim ng diktadurang paghahari na siyang katunayan ng “rebolusyonaryong gubyerno” ni Duterte, makapagbabalangkas ang mga taong tapat at sunud-sunuran sa kanya ng Konstitusyong kanyang inaasam, na siyang magtatakda ng “bagong normal” na kaayusang nais ni Duterte.

Sa ilalim ng diktaduryal na paghahari ng rbolusyonaryong gubyerno ni Dutere, walang makakatutol nang di makatitikim ng kanyang marahas na kamay na bakal. Tanging pwersang militar ang makahahadlang kay Duterte sa naturang kaayusan. 

Nais mo bang mamuhay sa ganitong kaayusan?

Kung ikaw ay nagpapahalag sa demokrasya, nagmamahal sa kalayaan at nagmamalasakit para sa bayan nang higit sa sarili, kumilos na ngayon pa lang bago maging huli ang lahat.

Huwag palinlang at pagamit sa pekeng People Power Revolution ni Duterte.

Lumahok sa mga protesta laban sa pakanang “rebolusyonaryong gubyerno” ni Duterte at iba pa niyang mga tiraniko at kontra-demokratikong hakbang.

Labanan ang tiraniya! Isulong at itaguyod ang demokrasyang bayan.

Nobyembre 2017