Legue of Urban Poor in Action (LUPA-Cebu)
Abril 2012
Sumala sa gipahamtang sa nagkalain-laing sirkumstansya, hilabi na sa ekonomikanhong kahimtang, naa na sa ika duhang guhit ang Pilipinas sa kalisod og kagutom. Sakit og subo man nga pamalandungon ta apan ang kamatuoran: LAKSOT NA KAAYO ANG KONDISYON SA KINABUHI SA MGA KABOS SA LAKSOT OG DUNOT NA KAAYO NGA SISTEMA! Apan si kinsa man ang angay nga basulon niini? Ang katawhan ba nga maoy tumang naninkamot og kamang? Sila nga maoy grabe kaayu nga naapektuhan sa tumang kalisod? Sila nga maoy nalapukan, makasugakod lang sa pang adlaw adlaw nga kalisod sa pangita? Sila nga maoy hinuypan sa ilang mga katungod, masalbar lang ang interes sa hut-ong mapahimuslanon? Budlay na kaayo nga pamalandungon nga kung kinsa pa ang napahimuslan, siya pa ang mugawas nga saypan!
Pipila na ba ka higayon hain tataw kaayo ang kawalay klaro nga suporta sa mga naa sa pangagamhanan ngadto sa mga uyamot! Ang karon nga administrasyong nanaad og kabag-uhan, duplikado ra gihapon sa mga miaging nagdumala nga walay laing tinguha kundili panalipdan ang ilang kaugalingong interes ubos sa sulsul sa tinuod nila nga BOSS! Kinsa mana nga boss? Ang giingon ba nila nga katawhan, nga walay laing naangkon og nadawat kundili kahagip-ot sa kinabuhi tungod sa dili makatarunganong pagpanag-iya!
Ang batakang serbisyo para sa masa,hain naman? Dili ba anam-anam nang gitangtang sa gobyerno ilang responsibilidad ngadto sa katawhan-nga hain subay ra pud kini sa nauso nga Globalisasyon nga walay laing boot pasabot kundi ang mas pagpauyamot sa mga kabos og pagpabilin sa pedestal sa mga hakog.
Maihap pa ba sa atong mga tudlo ang gidaghanon sa pagpanggun-ob nga gibuhat ngadto sa mga puluy-anan sa mga kabos tang mga kaigsoonan tungod og alang sa mga daw nanag-iya sa maong mga yuta? Sa mga panghitabong sama niini, wala na ba gayoy katungod nga mubabag pa kita sa demolisyon og musugot nalang ba kita nga gub-on ang atong kinabuhi?Maayo pa diay ang mga langyaw, adunay luna sud sa nasud ta! Ang mga mulopyo intawn, yanu-yanuhon lang og palayas sa panahon nga naa nay muangkon sa yutang tinamnan nila sa ilang mga pinobreng pangandoy!
Gihulagway na ang pagkupot sa mga elitistang hakog sa 90% nga bahandi sa Pilipinas-nga unta para sa 99% nga masa og dili para nila ra nga 1%ra man unta sila sa kinatibuk-ang populasyon sa nasod. Apan sa paglakat sa mga adlaw, buwan, mga katuigan, misamot ka timawa ang mga kabus!
Tanang panaliton niusbaw na ang mga presyo- pletehan, pagkaon, tambal., og bisan ang kantidad nga kinahanglanon sama sa edukasyon, ospitalisasyon og uban pa misaka na! Pero lilion ta ang presyo sa suhulan, misaka ba? Mas nigrabe paman gali ang dili makiangayaong kondisyon sa atong mga igsoong mamumuo tungod sa pagsagop og pagligalisa sa Kontraktwalisasyon sud sa atong nasud!
Walay benepisyo walay seguridad sa trabaho og mas sikbit sa pagpanamastamas- asa naman ang higayon ta nga mabuhi sama sa usa ka tawo? Kung in-ana nga way saka sa suhulan apan padayon sa pagsaka sa presyo sa mga panaliton hain naman ang higayon ta nga makapaeskwela sa mga anak, makapatambal sa mga nagmasakit,makapakaon og makapabisti sa mga pobre tang kaigsoonan?
Dili pagpakahilom ang tubag sa matag hait nga tunok nga mitusok sa dali mapukan tang kinabuhi og pagkatawo! Dili usa lang ka tawo ang muusab sa hagip-ot tang naabtan! Dili pagpakarun-ingnon nga saad ang muhunong sa kalisod tang nahiaguman- kun dili PAGBAROG, PAGLIHOK, PAGPAKIGBISOG!
Daghan tang napahimuslan
Gamay ra sila, di angay kahadlokan!
Tinabangay, mag-inunungay
Abton ta ang kinabuhing tinuoray!
No comments:
Post a Comment