IPAPASAR ANG MORATORIUM ORDINANCE ON DEMOLITION AND EVICTION WITHIN THE PUBLIC LANDS OF CEBU CITY

Nobyembre 13, 2014

Ang desente, hapsay, ug adunay dignidad nga kapuy-an ug pabalay usa ka batakang panginahanglunon sa taw isip mag-protekta sa atoa sa unsa mang matang sa panahon. Usa kini ka pundamental nga katungod nato ug kini giila sa mga International Human Rights Movement ug sa atoa mismong Konstitusyon ug sa ingon nga angay kini nga paga-respetuhon.

Apan ubos sa administrasyon ni Mayor Mike Rama ug sa iyang mantra nga “Hapsayon ang gubot, Limpyuhon ang hugaw, Pahumuton ang baho”, gikan sa iyang paglingkod isip mayor sa syudad ug hantod karon, daghan ang mga demolisyon ug mga clearing operations nga napatuman sa nagkadaiyang komunidad ug mga kadalanan kung hain kini hingpit nga gipatuman. Pero kung imong tukion ang mga nahitabong clearing operations nga ilang gipatuman ug gipahigayun, kasagaran ini iligal o wala naga-subay sa saktong proseso ug pamaagi sa balaod. Susama sa nahipalgan sa mga taga Warwick Barracks, Carbon kun hain human sila nasunugan o gi-sunog atong Enero sa niaging tuig, wala na sila gi-pabalik sa maong luna kung asa sila tawhanong nagpakabuhi, ug ang sobrang panimalay nga wala masunog, gi-demolis pud sab, madugo nga demolisyon ang nahipalgan sa mga taw didto. Hangtud karon nagpabiling nakigbisug ug naghandom ang mga taga Warwick Barracks nga sila mahataga’g hustisya tungod kay katungod sa kapuy-an ug panginabuhian mismo ang gihikaw sa ilaha. Mao pud sab ang nahipalgan sa mga sidewalk vendors sa syudad, ubos sa polisiyang Zero Vending Policy, sila nakasinati ug pagpang-harass sa han-ay sa mga PROBE gikan adtong Nobyembre niaging tuig ug hantod karon, biktima pud sab sila sa mga clearing operations nga dili makiangayon tungod kay wala gyud kini konsultasyon sa han-ay sa mga vendors ug walay saktong alternatibo o relokasyon para sa ilaha ilabi na sa mga vendors sa N. Bacalso(E-Mall ug South Bus Terminal), katungod kini sa panginabuhian ug dili dapat nga ihikaw sa ilaha.

Daghan pang mga komunidad sa dakbayan ang nakasinati aning mga demolisyon sa ngalan sa mga dagkong negosyo nga mao ang prayoridad sa atong gobyernu karon, ang kapait lang ang mga kabus gipangsalikway. Gatusan na ka pamilya nga hangtud karon, nagpabilin nga wala pa gyud intawn mahiluna, tungud kay desenteng panimalay ug panginabuhian ang nahikaw sa ilaha, mga estudyante nga nahunong nalang sap ag-eskwela. Unsa nalay palaabuton sa atong mga pamilya, kaugmaon sa atong mga anak kun kini nga pamaagi nila magpabilin nga hingpit.

Busa magkahiusa kita sa pag-uyon ug pag-suporta aron mapapasar kini sa Mayor ang duh aka ordinansa nga Moratorium on Eviction or Demolition of Dwelings in Public Lands o gang Ordinansa pagpasiguro sa pagpatuman sa Sec. 28 sa UDHA kun Urban Development and Housing Act. Kini nga mga ordinansa mupugong sa demolisyon kungwala pa kini mu-agi sa saktong proseso sa balaud ug kung hain siguruhon nga anaa ang pag-konsulta sa mga apektado, ug pagtugot sa Local Housing Board nga muhimo para sa checklisting, maghimu ug guidelines, ug magsiguro pagpasunod sa probisyon sa UDHA, ug labaw sa tanan ang paghatag ug alternatibo nga haum sa mga direktang apektado sa demolisyon o sa katawhang kabus. Kini nga mga ordinansa gi-aprubahan o napapasar na sa Konseho, kang Mayor Mike Rama nalang.

Walay maayong rason nga dili kini aprubahan sa mayor kay obligasyon kini niya isip amahan sa syudad ug labaw sa tanan, interes kini sa katawhan tungod kay katungod kini nato isip taw nga adunay dignidad, dili kita mga hayop nga pwede lang sa bisan-asa magpuyo.